A camiñata celebraráse o Sábado 26 de Xuño en Rois.
Queren favorecer o diálogo, aumentar a amizade e promocionar o respecto pola natureza e a actividade deportiva. Para iso organizan a Camiñata por parellas do Concello de Rois. Somentes admiten inscricións a xente que se achegue emparellada. Ao que ven só, casámolo, afirma con ironia un dos membros da organización.
A orixinal iniciativa vai xa pola súa terceira edición, e para este ano xa contan cunha parella que suma só 18 anos (neno e nena de 10 e 8 anos) e outra que alcanza os 138. A camiñata sairá ás seis da tarde do sábado 26 de xuño desde o polideportivo municipal de Rois, no quilómetro 4 da estrada Padrón - Noia.
A marcha será de dificultade baixa, aproximadamente 15 quilómetros. Haberá 2 controis intermedios, no que as dúas persoas que formen a parella, terán a obriga de pasalo xuntos. Por motivos de seguridade, a organización puxo como límite 175 parellas, para poder regular todo o percorrido, vixiando sobre todo as encrucilladas. O Concello de Rois ofrecerá uns pinchos ás persoas participantes, ao remate da camiñada. Anuncian tamén aparcadoiros, duchas e sorteo de agasallos entre os participantes. Uns dos promotores da camiñata por parellas, Arturo Reboyras, indica que hai uns anos organizaron unha iniciativa similar en Muiños (Ourense). Fora pouca xente e deixaron de organizala. En cambio en Rois, cada vez se reunen máis amigos do paseo, atendendo á chamada do colectivo Remonte. Sendeiristas de todas as idades e condicións sociais. O único requisito é inscribirse con parella.
www.andainabisbarradosar.com
III Camiñada por parellas no Concello de Rois
O Goberno da Xunta de Galicia contra as Asociacións Ambientais Sen Fin de Lucro
Consumouse o Martes 18 de Maio o que xa viña sendo un tónica habitual de non incluir as Asociacións sen fin de Lucro nos beneficiarios de subvencións para proxectos ambientais .
Logo de adicar tempo , esforzo e diñeiro para sacar adiante as actividades que vimos desenrolando dende a Asociación ambiental Colectivo Remonte (plantacións de árbores , charlas divulgativas , organización de andainas ambientais . . . ) , o menos que se lle pode esixir a un goberno e que lle aporte a estes colectivos , como o noso , pequenas cantidades de diñeiro coas que sufragar , ou alomenos ,minimizar os gastos que temos para sacar adiante as actividades .
No DOG do Martes 18 de Maio de 2010 sae unha orde da Xunta de Galicia , pola que estabelen as bases reguladoras para a concesión de axudas a entidades sen fin de lucro para facilitar a sua participación en material ambiental.
Na mesma DISPONSE que queda a orde sen efecto e procedese co arquivo do expedente
Mentres tanto , non saen de parar novas onde a Xunta de Galicia se gasta millóns de euros en publicitar as bondades da Lei de Costas , do Decreto do plurilingüismo . . . Só con adicar unha pequena parte dese despilfarro a actividades ambientais para os colectivos sen fin de lucro , o interese polo ambiente sairía claramente reforzado.
Pero , Mentres tanto , o Colectivo Remonte dentro das nosas posibilidades , seguiremos coa teima de adicar tempo e esforzo para desenrolar actividades ambientais que valoricen o noso meio ambiente mais próximo , principalmente nos colexios e coa franxa de idade mais nova .
QUEDA DITO
III Andaina por parellas Concello de Rois
Un ano mais , e xa imos pola terceira edición , organizamos xunto coa Área de Cultura e deportes do Concello de Rois , a III ANDAINA POR PARELLAS DO CONCELLO DE ROIS . A data será o vindeiro 26 de Xuño ás 18:00 da Tarde .
Mais información polo miudo no seguinte link
http://andainabisbarradosar.blogspot.com/
O Sábado vindeiro, ¡¡¡ III ANDAINA BISBARRA DO SAR !!!
Este vindeiro sábado 25 de Abril lembrádevos !!!!!!!
III ANDAINA BISBARRA DO SAR
Xa temos 400 persoas apuntadas . . .
ANÍMATE A PASAR ESTA XORNADA CONNOSCO
www.andainabisbarradosar.com
17 Abril - Xornada de limpeza do Rio Sar . Participa !!!!!
O Vindeiro 17 de Abril , a sociedade de caza e pesca de Padrón xunto co clube de pesca W.Latorre organizaron unhas xornadas de limpeza do Rio Sar á altura de Iria . Para isto contarán co auxilio de voluntarios do Colectivo Remonte , así como calquer persoa que desexe participar connosco .
A Xornada repartirase entre limpeza e desbroce do cauce e marxes do Rio Sar entre a Ponte de Iria e o Muiño de Lamas . Facemos un chamamento á colaboración , tomando como ponto de encontro ás 9:00 na Ponte vella de Iria , co fin de repartir á xente
ANIMADEVOS
www.surfcastingmasters.blogspot.com.jpg)
Importancia das abellas na conservación da biodiversidade
Serie de documentais curtos onde se pode ver a importancia que teñen as abellas , mediante a sua polinización , na conservación da biodiversidade .
Pequeno video da derradeira plantación feita en Dodro
Amosamos un link que contén un video da plantación feita en Dodro , con árbores apadriñados pola empresa de moda Adolfo Domínguez.
http://www.facebook.com/video/video.php?v=285992173765
Éxito da plantación de árbores en Dodro apadriñados pola empresa de moda Adolfo Dominguez
Da man da Asociación Ambiental Colectivo Remonte, os arredor de 160 alumnos do Centro Público Integrado Eusebio Lorenzo Baleirón de Dodro pasaron boa parte da mañá de onte en contacto coa natureza. Nunha parcela da aldea de Revixós, os escolares plantaron preto de 200 plantas de castiñeiro e carballo, que teñen un padriño de moda, a empresa galega Adolfo Domínguez. Pero o apadriñamento non se quedou so no papel, polo que a filla do deseñador ourensán asistiu a plantación e mesmo colleu a aixada na man para botarlle terra a varias árbores. Tiziana Domínguez explicou que no pasado Nadal a empresa decidiu regalar aos seus máis estreitos colaboradores unha árbore, que dende onte medra xa nunha parcela de Dodro que, ata hai dous meses, estaba chea de xestas.
Ao acto de plantación non so asistiron varios representantes do Colectivo Remonte, senón que tamén que contou coa colaboración do axente territorial para a Comarca do Sar da Consellería de Medio Rural, José Rodríguez, e os membros dun Equipo de Prevención de Incendios Forestais do Ministerio de Medioambiente. Previamente a saída a parcela, estes últimos falaron no centro educativo da prevención de lumes no monte. A charla tamén asistiu o xefe do Distrito IV Barbanza, Alberte Piñeiro.
Xa na leira, calzados con botas de goma e unha gorra na cabeza, neste caso obsequio de Adolfo Domínguez, os alumnos do CPI de Dodro, acompañados do profesorado do centro, demostraron que a aixada non lles é algo alleo polo que non dubidaron en collela para plantar as árbores e nalgúns casos ata se puxeron de manga curta debido ao esforzo, que a outros lles abriu o apetito e mesmo sacaron o bocadillo.
Todos coincidían en que a terra da parcela era moi boa polo que, dende o Colectivo Remonte, ninguén dubidou que as árbores prenderán sen problema. Así, o axente territorial animou aos escolares a volver no mes de marzo a finca para ver as medras das árbores. Dende o colexio, lembraron que os rapaces tamén fan plantacións dentro do recinto educativo polo que «aínda se lle dá ben isto de andar co sacho».
A pregunta de se estes escolares ían as leiras a traballar, todos coincidían en dicir que non salvo nalgún caso en que «me obrigan meus pais cando é de poñer ou quitar as patacas», dixo un deles. Outro rapaz recoñeceu que «meu avó si que ía a leira, se facía falta da mañá a noite». Ao final, plantaron arredor de 200 plantas de castiñeiro e carballo, especies frondosas e de folla caduca que o Colectivo Remonte quere levar a aquelas zonas arrasadas polos incendios ou en abandono.
A Asociación Ambiental Colectivo Remonte naceu no ano 2006 para poñer en marcha accións dirixidas a recuperar e reforestar as zonas queimadas pola vaga de lumes e, dende entón, xa fixo varias plantacións a través do seu programa Apadriña unha árbore que, nesta ocasión, contou co apoio da empresa ourensá Adolfo Domínguez. Pola súa banda, a firma téxtil aproveitou para afianzar o seu compromiso coa ecoloxía, tal e como lembrou onte Tiziana Domínguez. Coa plantación onte de case 200 árbores apadriñadas, o Colectivo Remonte ten a día de hoxe uns 300 padriños e madriñas e conta de seguir incrementando o número dado o fin da acción.
O Colectivo Remonte realiza o venres a plantación de 200 árbores apadriñadas por Adolfo Domínguez
A Asociación Ambiental Colectivo Remonte, con sede en Padrón, realiza o venres unha plantación de ao redor de 200 plantas de castiñeiro e carballo nun terreo do lugar de Lestrove, no municipio de Dodro. As árbores están apadriñados pola empresa Adolfo Domínguez que, o pasado Nadal, regalou aos seus máis estreitos colaboradores unha árbore que agora axudará a reforestar unha zona afectada polos graves incendios do ano 2006 ou, ben, en estado de abandono.
A actividade do venres comeza no Centro Público Integrado Eusebio Lorenzo Baleirón de Dodro, onde persoal do Colectivo Remonte impartirá unha charla técnica sobre a posterior plantación e sobre os incendios forestais. A continuación, os 160 alumnos do colexio, con idades comprendidas entre os 5 e 14 anos, desprazaranse ata a leira elixida para a reforestación.
A asociación ambiental facilitaralles as plantas (120 de castiñeiro e 80 de carballo), así como as ferramentas necesarias para a plantación e ata bos consellos prácticos para que as plantas teñan o máximo arraigamento posible. Está previsto que asista algún representante da empresa Adolfo Domínguez, posiblemente a filla do deseñador. Con esta iniciativa, a firma afianza «ou seu claro compromiso entre moda e ecoloxía».
O Colectivo Remonte naceu por mor dos incendios de 2006. Ten en marcha un programa que leva por título Apadriña un árbore, para reforestar con especies frondosas autóctonas zonas afectadas polos lumes.
Fonte La Voz de Galicia (Mércores 27 Xaneiro 2010)
